Жарияланымдар

Азаптады деп айыпталған полицейлерге қатысты сот процесі жалғасуда

2 мин чтения

25 қазанда Қостанай облысының Қарабалық аудандық сотында 20 жастағы Любовь Дорошенконы азаптады деп айыпталған екі полицей — Арман Төлегенов пен Нұрлан Сәрсембаевтың ісі бойынша кезекті отырыс өтті. Отырыста айыпталушылардан жауап алынды. Қараңыз: «Кенттегі учаскелік полицей және оның үш бастығы», «Ауыл детективі»).

Учаскелік полицей Арман Төлегеновтің айтуынша, 8 сәуірде оның телефонына округ әкімінен хабарлама келіп, әкімнің әйелімен байланысуды өтінген: әйелге тиесілі дүкенде бірдеңе болған. Оқиға орнына барған полицей дүкен иесінен бөтен құлып табылғанын естіген. Содан кейін олар құлыпты ашуға келіскен.

— Көлігімнің жүксалғышынан темір сүйменді алып, құлыпты аштым. Екінші есікте әйелдің өз құлпы тұрды, оны кілтпен ашты. Ішке кіргенде дүкен иесі тауардың бір бөлігі жоғалғанын анықтады. Бәрін аудандық ішкі істер бөлімі бастығының орынбасары Амантай Ағайдаровқа баяндадым. Ол барып жағдайды анықтауды тапсырды да, жедел уәкіл Нұрлан Сәрсембаевты мән-жайды тексеру үшін Лесное ауылына жіберді, — деп түсіндірді полицей.

Сәрсембаев 9 сәуірде келген, келесі күні таңертең адамдарды тексеру керегін айтып, олар Дорошенко қонақта болған Каельдің үйіне барған. Неге жауап алуды осы әйелдерден бастағаны сұралғанда Арман алдыңғы кеште Сәрсембаев «ақпарат берушімен» кездескенін, сол адамның ұрлықты қыздар жасауы мүмкін деп болжағанын айтты.

Учаскелік полицей ол ақпарат беруші осы іс бойынша куәгер ретінде жүрген Ульянов екенін қосты. Алайда бұған дейін сотта Ульянов басқаша айтқан: Любовьты танымайтынын, ол туралы жаман ештеңе айта алмайтынын мәлімдеген.

Сәрсембаев болса ақпарат беруші Ульянов болғанын мүлдем жоққа шығарып, Дорошенконың ұрлыққа қатысы болуы мүмкін деген мәліметті кім бергеніне жауап бермейді.

Басқа тұрғындардан өз үйлерінде жауап алынған кезде Дорошенко мен Каельді неге учаскелік полицейдің кабинетіне шақырғаны да түсініксіз қалды.

Жәбірленушінің айтуынша, полицейлер оған қатысты «тексеру» жүргізгеннен кейін үшеуі бұрын балабақша болған қараусыз ғимаратқа барып, оны ұрланған тауарды іздеу үшін шатырға шығуға мәжбүрлеген.

Құқық қорғау қызметкерлері мұның болғанын жоққа шығармайды, бірақ оны ешкім мәжбүрлемегенін, өз бастамасы болғанын айтады: бірнеше күн бұрын балалардың сол жерде бірдеңе жасырғанын көріп, ғимаратты көрсетуді өзі ұсынған-мыс.

Ал сотталушылардың екеуі де Дорошенконы ұрғанын және қандай да бір ақша алғанын үзілді-кесілді жоққа шығарады. Сондай-ақ тергеу әрекеттерінің егжей-тегжейі мен шын мәнінде кім ақпарат бергені туралы сұрақтарға жауап беруден бас тартты.

ДЕРЕККӨЗ:
https://bureau.kz/novosti/sobstvennaya_informaciya/otrabotali/

Қазақстанның азаптауға қарсы ҮЕҰ коалициясының материалы